معاك كمامة ؟ بقلم شريف درويش


0 36

معاك كمامة ؟

معاك ضمان للأمان وللسلامة

معاك لقاح يرجعلى اللى راحوا

قلبى لسه بيعاني ف جراحه

اللى كانوا جوا منى

عاشوا ليا وشالوا عنى

حياتى واقفة من لحظة ما غابوا

مين بيقدر ع الفراق وناره وعذابه

الطبيب شخّص أنيميا

قلنا سهلة مش حتبقى يعنى كيميا

كيسين تلاتة نقل دم

شيكات تبرع وكله كان جدع وشهم

مكملش كيس الدم واتجلّط

اتشائمت وقلت يمكن ف حساباتى أغلط

فجأة كحة أشعة كانت مقطعية

التهاب شديد أكد الشك اللى فيا

خليه يروح حجر صحى فى مبنى عزل

الدموع ملت عنيا ويوم عليا مكنش سهل

وكنت عارف إن ده مشهد أخير

طب خدونى أبقى جنبه على السرير

وبعد ما كنت سانده بدراعى

سبته على جهاز تنفس صناعى

خلى بالك م العيال

ياسين ويوسف الجمال

رحت بايسه فوق دماغه وغصب عنى مشيت

مستشفى بتكلم أخويا إنهارت وبكيت

البقاء لله ف بابا نال الشهادة

كانت كرونا ما تكتبلوش السلامة

مين دلوقتى يحب يسألنى

لو لسه فارقة معايا الكمامة ؟


اترك رد

لن يتم نشر عنوان بريدك الإلكتروني.