مهارات الطفل👶فى العام اﻻول من عمره


0 35

 :

1-اكتر مرحلة لنمو طفلك عقلياً وبدنياً وذهنياً فى السنة اﻻولى.

2-الطفل بيبقى كامل النمو لو عمره الرحمى من 37 اسبوع فيما اكتر.

3-الطفل بعد الوﻻده مباشرة ﻻزم يعيط لو ماعيطش يبقى فى مشكلة.

4-الطفل بعد الوﻻدة بنعرف نظره 👀بالضوء وبنعمله اختبار لما نقرب الضوء لعينه بيقفل عينه وده مهم.

5-بعد الوﻻده لو نيمنا الطفل على بطنه هيجر راسه يمين او شمال بدون مايرفع راسه.

6-بعد شهر من الوﻻده لو نيمناه على بطنه هيقدر يرفع رقبته.

7-بعد شهرين لو نام على بطنه يقدر يرفع رقبته وكمان صدره.

8-عند سن شهر يقدر يتابع اللى قدامه بزاوية 90 درجة.

9-عند شهرين يقدر يتابع اللى قدامه مجال رؤية كاملة يعنى يبص بعينه مش بدماغه .

10-عند شهر بيهتم بالوجوه اﻻدميه لما حد يبصله.

11-عند شهرين بيتابعه بابتسامه ودى بنختبرها بدون لمس الطفل مجرد عينك ماتيجى فى عينيه 🙂

12-عند سن 3 شهور بيسند راسه ونقلق لو هو عنده 4 شهور وماسندش راسه !

13- عند 3 شهور يبدا يطلع اصوات زى اغغغغ (مش عارف اكتبها 😊 )

14-لما اخضه يعمل شكل الخضه دراعة ورجله يفردهم ويتنيهم بسرعة ودى موجوده من العمر الرحمى 28 اسبوع ل 4 شهور بعد الوﻻده لو اخرت عن كده نقلق.

15-يتولد بيبقى كف ايده مكلبش والاصابع اﻻربعة مقفوله على الصباع الكبير وده لسن شهرين لو اخر نقلق.

16-عند 4 شهور الطفل هيلف رقبته كامله لﻻصوات.

17-عند 4 شهور الطفل بيضحك بصوت 😊

18- عند 3 شهور كمان يتوقع لما ماما تبصله وضع الرضاعة
بيحرك رجله وايده استعداد للرضاعة.

19-عند 4 شهور لو حد زعله او مامته سابته او حد عكنن عليه يزعل ويتقمص ويعيط لرد الفعل ده ويبان على وشه.

20-عند 5 شهور بيمد ايده ويكلبشها على شئ متحرك يعنى لو حركت قلم قصاده يمسكه.

21-مافيش فى السنة اﻻولى ايد عزيزة عليه عن التانيه يعنى ﻻ فى ايمن وﻻ اشول بﻻش افتكاسات اﻻتنين زى بعض.

22-بيمسك الحاجة عند 5 شهور ببطن اليد.

23- عند 7 شهور يقدر يمسك اى حاجة بأنامل اليد.

24-عند 9 شهور يمسك زى الكماشة كده المستوى اﻻعلى لمسكة اى حاجة قدامه.

25-الطفل اقل من سنة اى حاجة يمسكها يحطها فى بوقه بعد سنة ﻷ .

26-بعد سنة لو فى حاجة فى ايده يرميه او يخبيها معاه لما يكون صايع ومدقدق 😊
27-الطفل بيقعد لوحده عند سن 7 شهور.

28-الطفل من سن 5 شهور يتقلب من بطنه لضهرة ومن ضهره لبطنه عشان كده بنقول لﻻمهات ماينفعش يتساب على السرير لوحده فى السن ده .

29-الطفل بيزحف على بطنه عند حوالى 8 او 9 شهور.

30-الطفل بيحبى عند سن 9 او 10 شهور.

31-بيمشى👣 من سن سنة ل سنة ونص.

32-نقلق لو اخر عن سنة ونص فى المشى.

33-عند 9او 10 شهور بيبدأ يقول كلمة او اتنين زى ددددا او مممما واتفقنا انه ﻻ معناه بابا وﻻ ماما.

34-عند سن سنة بيبدأ يقول كلمات قليلة.

35-التسنين🦷 بيبدأ من 6 شهور ومعانا لحد سنة.

36-بيعرف اﻻم عند حوالى 4 شهور.

37-عند سن 6 شهور مايرضاش يروح لحد تانى بسهولة او لما يكون متضايق او زعﻻن ماحدش يراضيه غير مامته او باباه اﻻ لو كان باباه ظابط او دكتور مالوش سن معين وغالباً مش هيعرفه 😢

38-المفروض عند سن 6 شهور لما دكتور يكشف عليه مابيبطلش عياط ورخامه وغتاته عليه وكلما زادت سفالته على الدكتور زاد ذكائه يعنى لو بيضحكله ومبسوط فى السن ده مش طبيعى🤣 !

39-عند 9 او 10 شهور بيشاور باى باى.

40-عند سن سنة يقدر يرمى اى حاجة من الشباك فخدى بالك من موبايلك📱 انا مش مسؤل ✋


اترك رد

لن يتم نشر عنوان بريدك الإلكتروني.