حرب باردة … بقلم الروائية / غادة العليمى


0 37


بقلم الروائية / غادة العليمى
نتفرج وبعدها نحكم الجملة دى اتعملت مؤخرا تريند على الفيس بوك
لكنها مش مجرد تريند فيسبوكى
ده رد فعل للفعل اللى اتعمل على مسلسل احمس مضاد له فى الاتجاه لكنه غير مساوى له ابدا فى المقدار
القصة كبيرة وخطيرة حرب من الحروب البارده اللى بنسمع عنها
لو فيلم المهاجر اللى حصد دشليون جايزة كان اتعمل ايام التريندات كان اتسجن فيه يوسف شاهين وخالد النبوى قعد فى بيتهم ما مثلش تانى
لانه فيلم مقتبس بالملى من حياة سيدنا يوسف
اللى قام بدوره خالد النبوى .. وكان طبعا منتهى استهبال
ويسرا اللى عملت مرات العزيز منتهى استسهال
ومحمود حميدة كان العزيز وكان عنده كمان مرض مسخرة يعر الفراعنه كلهم ليوم الدين
وانا كغادة ما اعرفش ازاى الفيلم ده نجح واخد جوايز
كمان الناصر صلاح الدين .. كان كله اخطاء كارثية وسقط سينمائيا والمنتجة افلست بعده لكنه نجح جدا جماهيريا لدرجة ان صلاح الدين بقى الاستاذ احمد مظهر فعلا
كمان مسلسل بوابة الحلوانى اللى كان عن فترة الديوان والخداويه كانت كله حكاوى خيال فى خيال .. مسلسل طومان باى اكتر من مؤرخ اعترض عليه لكنه عدى ونجح لانه ما اتعملش عليه تريند
والامثلة كثيرة فى الدراما المصرى
اما فى الدراما الاجنبى مسلسل سيدنا يوسف الايرانى اللى نجح جدا جماهيريا جدا هل اى حد من الجمهور اللى عجبه المسلسل كان بينه وبين نفسه مقتنع بالنجم اللى قام بدور سيدنا يوسف اللى النسوه قطعوا ايديهم من شده جماله .. طب ازاى ؟؟ وبامارة ايه ؟؟
انطونيو كوين لما عمل عمر المختار كانت لا ملامحه عربيه ولا بشرته تليق تكون لمجاهد عايش بين الجبال بين الشمس والبارود وعمر المختار الحقيقي كان ارفع بكتير من انطونيو كوين الممثل
مشكلةالمسلسل انه نزل تريند
و الاعتراض عليه اتصنع فى غرف سفلية لصناعة التريند ومعظم الصفحات اللى عملت عليه كوميكسات لا هاممها تاريخ ولا فاهمين جغرافيا
ده غير ان تصميم الكوميكسات دى شغله تصميم وماركتنج و ناس بتاخد عليها فلوس علشان تعملها .. عملتها المره دى مجانى لوجه التاريخ والحضارة المصرية
ولو حاورت اى حد على اعتراضه هيقولك اصل عمرو يوسف المجرم مش عايز يحلق ذقنه ويشتمه
طب فين الرقابة ما بتتشتمش ليه
فين الانتاج والاخراج ولجان التصحيح فين حق نجيب محفوظ صاحب الرواية نفسه
الحكاية ان المسلسل عملاه الشئون المعنوية وصرفت وكلفت علشان عايزاه يطلع عمل جماهيرى مبهر بالصوت والصورة يعجب الناس ويتكلموا عنه وده كان هيحصل فعلا وكانت الناس دى هتتبسط من العمل وتقولك الله فراعنه
بس اللى حصل ان فى جهه تانية مش قادره تعترض على الاختيار واكلت صوابع رجليها من الممر وشاطت من طومان باى اللى كان ضد آل عثمان اللى اتسوق لها صح وصارت ايقونة الخلافه
والجهه دى شايفه فى اتجاه لارجاع الهوية وتمجيد رموز مصر والحديث عن قوة جيشها من زمان
فحابه تضرب ده كله وتهيج الناس
والناس مجرد اداة فى ايديهم
زى الحرب اللى قامت على رمضان بالظبط والناس كلها مشيت ورا تريند قاطعوا محمد رمضان وظاطوا نفس الظيطة لما المسلسل اتوقف
قالوا انتصرنا وهزمنا الجاسوس
رمضان دفع لبتوع التريند فى الغرف السفلية الجروبات اتقفلت والمسلسل اتذاع والناس نسيت وهتتفرج وهتعمل جماهيرية للعمل كمان ودى نتيجة اكيدة من الكنترول
ولو رمضان عمل دور احمس من غير ذقن هيقولوا الله يا رمضان
القصة لا تاريخ ولا جغرافيا ولا ذقن ولا شنب
القصة حرب تريندات بين جهات غير معلومة وصدى السوشال ميديا اداه فيها بالنسخ واللصق مجرد حرب بين جهتين
مين هيكسب فيها الله اعلم
طبعا فى جهه معترضة فعلا على اخطاء تاريخيه فى المسلسل ودى جهه المثقفين الحقيقيين ، لكن دول اصواتهم لولا التريند واهله ماكنش حد سمعها ودورها فى الحرب دى لتدعيم المنع مش اكتر
لكن عامة انا كغادة ارفض الحكم قبل المشاهدة
وان كنت شايفة مسلسل بيتكلم عن ملوك الجدعنة اللى همه سواقين التوكتوك
يبقى من باب اولى اتفرج على ملوك مصر
#اتفرج_وبعدها_احكم


اترك رد

لن يتم نشر عنوان بريدك الإلكتروني.